Axmed-Siilaanyo Iyo Maansadiisii Mahadhada Reebtay Nagula Nasta

Markale Ramadaan Kariim, Akhyaartayada ku kala baahsan Dacalada Dunidaow. Waxaan Filayaa inaad la socoteen Wacdarihii ka muuqday Maansadii Metelaada ahayd ee uu soo bandhigay Madaxweyne Daahir Rayaale Kaahin,  Tuducyadeedii inyar hadaan kasoo qaadano waxaa kamida:

Tan anaa ka diigoo
Gabigeed danbaabee
Dawo kale ma haysaa

Marhadan nin door xidhay
Daalalay sameeyiyo
Gaariyana isdaba dhigay
Sheekhiina dooh idhi
Tolow yaa danbeeyoo
Baritana la soo diri

Duqaydii dhulkeeniyo

Golayaashu duug male
Docdayday ka buuxaan
Doolarkiyo xisaabtiyo
Doonbarada qaataan
Maydinkaa wax didin kara
Dadkan seexday kicin kara
Danahooda fulin kara……

Erayadaa bilaa Xirribiha ah iyo kuwo kale oo kasii daranba, markii uu Daahir Rayaale indhaha ka mariyey Cid kastoo soo daymoota, maxaad ka filan kartaa Ciddii ay Loolanka kuwada jireen ee ay kamid yihiin Axmed-siilaanyo iyo Faysal Cali Waraabe inay iyaguna kaga jawaabaan. Bal aynu ku horeyno oo aynu eegno Jiiftada Siilaanyo iyo Meesha uu ka fad kudiyey, Maansadan Axmed-siilaanyo oo iyaduna ah mid matalaada oo kaftana, sidoo kalena ah mid bilaa turxaana, kana reeban waxkastoo keensan kara Cuqdad una muuqan kara aflagaado ama Cay ah.

Mudane Axmed Maxamed Maxamuud (Siilaanyo) Waxa uu ku bilaabay Maansadiisan qiimaha badan sidan:

Midkalaana garab furan
Sheekiyo guyaal hore
Guud cadaadaheediyo
Gadhwadeenadeedaa
Bari sheeko gooyoo
Guntay oo ku baanoo
Waxay tallo gorfeeyeen
Dadka geeska yaalaa [geeska afrika]

Guga iyo da’doodoo
Sii guura mooyee
Caqligiyo garaadkood
Wali goobti kama kicin

Maahmaah gu-waynbaa
Ku gadaaman taasoo
Aan ahay gadeedii

Anna waxaan garmaamada
Iyo waranka guunka
Ku gardaadiyaayoon

Gabaygiyo heestiyo
Geeraaradaydiyo
Maansada u guud furay

Nabar baa i gubayoo
Gocashaa i jiiftoo

Gorod lulasha mooyee
Gundhin waayay madaxii

Gacal aan u qayshiyo
Guri aan ku hiiliyo
Gacan saarki iga dhimay

Gafkan aan tirsanayiyo
Godabtana ninlihi diid

Garaad-maalayashiyo
Guurti aan u geeyiyo
Geedkiyo ragiisii
Isna waa galgalin madhan

Guunyadaydan fooftana
Gabaareey qaniintiyo
Gofanaa ku naaxoo
Gurigay u hoyatana

Gaadiyo in miratiyo
Ku gadaaman bahaluhu

Ubadkiyo garboobkiyo
Gabbanada caruurtana
Gaawe looma qaado
Gorof looma buuxshoo

Gabi-dhaca habeenkii
Gaajaday la qayshaan….

Gacmo hoorsigaygana
Ibna-aadmi gayi waa
Guulahaan u fidiyaa

Wali gaasiraadii
Kama bixin guhaadii

Inkastoon ku gaylamay
Geerina u soo maray
Waayay guunyo badan iyo
Geesiyaal la sheegiyo
Gobaad iyo dhasheedii

Afartaasi godob li’i
Mid kalaana garab taal

Gadhkan aan rifaayiyo
Timahaan gilgilaya

Waa cadho gun dheeriyo
Gufo li’ida talladiyo
Goosgoosankaygiyo
Ilawshaha isoo galay

Baadi goobistaydii
Gasiinkaan ka dhaartiyo
Gadoodiga habeenkii
Gudcurkaan u soo maray

Waxaan goodka jiifiyo
Halaq boqonta gooyiyo
Gaadaaga aarkiyo
Inta gabbi dugaag iyo
Galowgiiyo haadi iyo
Shabeel geeddo fuuliyo
Gurguurta abeeskuba

Igu gaylameenee
Wadku guudka iga daday

Garaadkaa i fari jiray
Hashu way gabdhowdoo
Gafanaa ku yaalee

Dhiidhitii ganafkiyo
Garbahaba ka soo mari

Laga gudub midkale garo

Xagu gabbi xaguna gabi
Guntu walac ma noqonine

Guntanaha u faashiyo
Geedo gooye weeyaan

Ninka guursan waayee
Gaabsiga ku haysta

Xidid gooyaheediyo
Gocor bay u hoyataa

Boqon gooyaheediyo
Kii shalay gu tiraybaa
Gaawaha u sii sida

Darkaloon la garan iyo
Gaaraagucuun iyo
Ma gayday u raran tahay

Taa gar waaqsigeeduna
Kuwii goosan waayee

Geeridu haleeshee
Godka iyo xabaashiyo
Aakhiro u guuroo

Ifka gacaladoodiyo
Gaaridii xanbaartiyo
Gabanada dhashoodii
Baaho loogu guraya

Wanaag waa la gooyoo
Xusuus waa la gawracay
Gafku maaha dheeriye
Dar uun baa gardaadshoo
Gardarada nusqaanta ah
U garoomo tollayoo
Guntigana usii xidha

Dhaaxaan guclada dheer
Raadkeeda gurayee
Maantana god baas iyo

Ga-go madhan istaagtoo
Galoof iyo wax baasiyo

Gudhan bay ka yeeleen

Gobbodiyo warkaygii
Soo gunaanadkiisii
Waxa aan ku gaabsaday

Gaydhankii hargaysaay
Herer goonyaheedaay

Burco goodigeediyo
Gacmo saarahaygiyo
Bari iyo galbeedeey

Gacamada Barbara iyo
Bada geedigeedaay

Gobonimo xadeed iyo
Sheekh gacalka yaalow

Awdal garab-galkeediyo
Baradii Gabiilaay

Goodiga ban cawl iyo
Golis iyo Sanaageey
Halka geelu daaqiyo
Sool dhaqan ku guuraay

Balli gubadlahaygiyo
Inta geesi joogaay

Halka goolku yaaliyo
Halka libini gibidh tidhi
Inaad garasho leediin
Garaadka ku haystee

Aan gaadho meeshoon
Gobonimo fadhiistee

Foodkiina guusha leh
Tollow igu gargaaroo
Gabban hayga reebina

Dhammaad.

 Halkan Ka Akhriso Maansadii Daahir Rayaale

Kollay Wada Fahante halka uu Kaftanku maraayo, Dhugane Labadan Hoggaamiye halka uu midba ka hillaacay, Waxaan filayaa inaad idinkuna aad tabaysaan Hoggaamiyaha Saddexaad oo ah Faysal Cali Waraabe iyo Meeshuu kasoo mudho, Waxaan idiinka hayaa Maanso aad u qiimo badan oo aad idinkuba ila arki doontaan, ha moogaanina Insha Allah Berri Ama Sahadambe ayaan idiin soo gudbin doonaa.

FG: Haddii aad wax saluug ah ku aragtaan, ama aad u baahataan ibo bixin dheeraad ah, Fadlan waxaad lasoo xidhiidhi kartaa Abwaan Qol-qol.

Waa Eraydii Abwaan Mawliid Aadem Qol-qol

E-mail: Qolqol3@hotmail.co.uk

E-mail: Salaanmuctasim@hotmail.com

Hargeysa, Somaliland