Asalaamu Calaykum Waraxma Tullaahi Wabaraakatuhu,
 
Marka hore ddhammaan Ummadda Reer somaliland madax iyo shicib, Yar iyo wayn aqoon yahan iyo indheer garad Waxaan idin leeyahay RAMADAAN KARIIM. Maanta oo ah maalin Axad ah waxa aan doonayaa inaad ila wadaagtaan Tixdan gabayga ah ee ku saabsan waayaha dalka.
 
Tixdani waxay soo baxday Shalay oo taariikhdu ahayd 06/09/2009 Macnaha iyo xuxurka tixda ayaa loogu tagayaa ujeedadu se waa talo iyo canan guud oo dhamaanba dawlad iyo shicib ku socota
 
Iga guddooma guulaamo
 
 

Gabay bilic leh guulaamo iyo gaydha arartayda

gucle orodka guuraynta  iyo geedan iyo baacis

Garta inaan naqnaa maalintay nala gudboonaato

Geed caleenta buuxsaday markii gugu barwaaqeeyay

Ubuxuna garaaraa fidshoo gorada laalaadshay

Oo hoobaan guduud uur casaan guudka uga buuxdo

Gadhcadiyo duqaydii raggii golaha soo buuxshay

Ee dood gondaha lays daree baane lagu goohay

Ee gabayo laysugu tirshee laysku ganay jiibta 

Guushu laba ma raacdee markay gees isugu baydhay

Gardarada ninkeedii haddii guudka laga saaro

Marka xaal gondaha loo sudhee geelal laga miidho

Ma garwaaqsanaayee hadduu guuxa damin waayo

Uma garab gureeyaan tolkii laga gol roonaaye

Inay geed qudhaanja leh ku xidhi waa ged la hubaa.

Afartaa gantaalaa dhiciyo gaade iyo maag dheh

Hanqadh gabaygi uu tirin jiriyo waa tix guro wayne

Ma gadeeyay waan soo wadaa gunu dhaceediiye 

Gantaal igu mudnaydiyo mind iyo laygu ganay waayo

Cadaw ii gabaday oo falaadh galiyay jiidhkayga

Guhaad iyo canaan iyo af xumo godobo ii yeelan

Gabaaray i gaadiyo maskaa ganaya dhiigayga

Goodaaddo nacabiyo tukaha gura xuneey dhuuryo
 Gabigood shisheeyihu hadduu igu guraabaaso

Ama gaadhi laysoo rakibo qaraxna gawdhiidho

Ama gaban la weecsaday garnayl jeebka loo galiyo

Ama guuto laysoo kacshiyo gaadmo iyo duulan

Gobanimo anaa lehe hadaan cidi la guuraynin

Goolaaftan caadaystahoow sow ku guban maysid 

Afartaa gudoonkii murtida galalafteedii dheh

Gufaaciyo  gariir soo onkoday guggii da’ay dheh

Geddii muuse aayiyo jadeer gabayadoodi dheh

Giddigeed adduunyada dhib wuu gaadhi jiray waaye

Way galalafaan xaajadii loo gol leeyahay e

Garyaqanadooday murtida godol ka maalaane

Wax kastoo gur loo wado rag baa gooya xubinteede

Is garwaaqsi baa lagu dayaa laguna gaadhaaye

Is giriifku waa ceeb haddii la isba gooyaaye

Gabantiyo ma gaydada u tudha guuli waa waliye

Guurti baarlamaan iyo dhamaan golaha waayeelka

Gadh wadeenadeeniyo sarkaal gaadhka lagu meershay

Guluf iyo askari gaadhan oo qori ku gawdhiidha

Gurboobkiyo caruurtiyo haween wada gamboolay ah

Gaashaan qaadka joogiyo dhamaan geeshka iyo ciidan

Inta gudaha joogtiyo kuwaa yurub ka goohaaya

Giddigeenba waa wajib kaa loo gudboonyahay e

Gol daloolo aan dhawrro iyo godob wixii reeba

Giddigeed aduunyada intuu gaadhay magaceenu

Waa nabad waxaan goorkastaba gole ka sheegnaaye

Waa nabad waxaan guusha iyo libin ku gaadhnaaaye

Waa nabad waxaan laga go’ayn gama’an jiifnaaye

Waa nabad Waxaa lagu goglee loo golyahayeeye

Haddaan galin ku laalaabanoon galino baaruudda

Ama aan qoryaa gurano oo goyno ubaxeenna

Ama aan is kala goosanoon qaarba dhan u guuro

Goblan talo inay taagan tahay saw la garan mayo

Afartaa gudoonkii murtida galalafteedii dheh

Gufaaciyo gariir soo onkoday guggii da’ay dheh

Geddii muuse aayiyo jadeer gabayadoodi dheh

Umaddiba gig bay tidhi markii hawshan loo galay e

Guddoonkii la laalaa dadkuba wada gadoodeene

Xisbiyadana guux baa ka baxay aan la garanayne

Gurmadkii axmaarkiyo intii guurti ugu baaqday

Gaaladu dar ay soo dirtaa sheegtay gacalkaaye, 

Halkay fara la gaadhaanna durbaba way gambiyayaane

Galbeed iyo baraa laysku wacay labada geesoode

Waxse lama guddoomine arini way guracantay e

Guddoon meel fog laga soo waddacay guul ma soo sido e

Garawsada wax baa laga bartaa raadki soo gudhay e.

Taariikhda guunka ah intii xaajo laga giigay

Gu kastaba waxbaa lala raftaa lala gurguurtaaye

Kolba godobhorlaa loo kacaa lana gorfeeyaaye

Hadba waxa lakala giijiiyaa kii horee gudhay e

Intaan goray god galay din u guday daba guclaynayno

Ama sida giraantii dhamaan goob ku tudhanayno

Geesaha ragbaynaga xiga diiday gam’iiye

Iyagoo gantaala dhiciyo haysta qori gaaban

Ayay geeddi soo wada yihiin goor iyo ayaan e

Hadday gam’sanaan naga helaan way gambiyayaane

Hadba gobol ayay doonayaan inay garoocdaane

Waar yaan layna soo galin arini way is guraysaaye

Aan gunaanad keediyo murtida gooyo hadlkiiye

Allahyow gunimo waa belee guusha nagu aadi 

Allahayoow gayiga noo nimcee roobnawada gaadha

Allahayoow afgarad raaga iyo talo an guumoobin

Allahayoow gargaar iyo nasii gacanna taageerta

Gees iyo illaa geeska kale dawlad wada gaadh

Gurboob kiyo mid maatada waddoo wada gunnaynaysa

Danta guud middii garanayseen gaar u dhaqanaynin

Alahyow adaa garanaye guusha nagu toosi

 
Wabbillaahi Tawfiiq
 
Faysal Awcabdi Cambalaash
faysal_awcabdi@hotmail.com

         London UK

www.abwaanka.com